శిరిడీయే పోవాలా !

శ్రీసాయిని దర్శించ శిరిడీయే పోవాలా!
సద్గురువుని సేవించ మందిరమే చేరాలా!

పసిపాప నవ్వులో నీ దరహాసమే
పచ్చని పైరులో నీ ప్రతిబింభమే

నాట్యమయూరిలో నీ తన్మయ నృత్యం
కోయిల పాటలో నీ మధుర స్వరం

కురిసే చిరుజల్లులో నీ కరుణామృతం
వీచే చిరుగాలిలో నీ చందన పరిమళం

పూసే పూలలో నీ ప్రేమ మకరందం
మెరిసేటి తారలలో నీ సుందర నయనం

వేసే ప్రతి అడుగులో నీ దివ్య చరణం
స్పందించే హృదయంలో నీ నామస్మరణం

ఏ చోట చూసినా నీవే ఉన్నావు
ముల్లోకాలకు ప్రభువై మమ్ము రక్షించుచున్నావు